يلا نتعرف على كورة السلة 

رؤية وائل 

ايوه هي الكوره اللى بنجرى واحنا بنططتها ونحطها في السلة المتعلقة دي، اينعم القصيرين بيكون صعب عليهم شويه زي حالاتي بس من امتع واحلى الرياضات اللي ممكن تلعبها، يلا بينا نعرف اكثر عن كرة السلة..

 كرة السلة هي رياضة جماعية وشعبيه، بيتنافس فيها فريقان، كل فريق مكون من خمس افراد وهدف كل فريق أنه يدخل الكرة  في السلة، والفريق صاحب النقاط الأكثر هو اللي بيكسب، ومن الصعب أن الفريقين يتعادلوا لان بيكون في وقت معين للمباراة.

 ومن اساسيات اللعبه ان اللاعب يتحرك بالكرة في الملعب لحد السلة عن طريق طنطتها وده بيسموه "المراوغة" أو يديها لبقية الفريق عشان يوصلو للهدف.

 وممنوع أي احتكاك جسدي يكون هدفه كعبله اللعب خلال الماتش، ووقت ما يخالف اللاعب قواعد اللعبة يطرد مباشرة من اللعبة ويستبدل بزميل آخر من نفس الفريق.

من احلى الالعاب اللي ممكن تلعبها بجد، كفايه روح الفريق مع بعض وهو بيتعاون مع بعضه عشان يجيب نقطة، والمهارات اللي بتعملها بالكرة وانت رايح للهدف  زي انك تلف الكرة حولين وسطك او انك تعديها مبين رجلك وانت بتجري بيها، عشان تبين للاعب المنافس انك لعيب حريف وكدا. 

مش شرط الباسكت، بس خلي الرياضة جزء من حياتك صدقني ده هيفيدك جدا وهتحس بفرق.